आज मिति २०८२/०९/२१ गते नेपाली काँग्रेस भक्तपुर जिल्ला सभापतिको नेतृत्वमा आयोजित पत्रकार सम्मेलन केवल औपचारिक कार्यक्रम मात्र होइन, भक्तपुरको समग्र कांग्रेस संगठनको अनुशासन, विश्वसनीयता र नेतृत्व क्षमताको परीक्षा सरह भएको देखिन्छ। निर्धारित समयमै नियमित महाधिवेशन सम्पन्न हुनुपर्ने माग सहित गरिएको यो पत्रकार सम्मेलनले पार्टीभित्रको संस्थागत अभ्यास, लोकतान्त्रिक मूल्य र सहमतिको संस्कृतिप्रति पार्टी नेताहरूको गम्भीर चासो प्रष्ट संकेत गर्दछ।

कार्यक्रममा सहभागी नेताहरूले भक्तपुर जिल्ला पार्टी समितिलाई अब ढिलाइ नगरी स्पष्ट निर्णयमा पुग्नुपर्ने, आन्तरिक मतभेदलाई संवाद र सहमतिबाट समाधान गर्दै महाधिवेशनलाई सफलतापूर्वक सम्पन्न गर्नुपर्ने आवश्यकता औंल्याए। पार्टीभित्र सुदृढ संगठनिक संरचना, नेतृत्वको वैधानिकता र कार्यकर्ताको मनोबल जोगाउन पनि महाधिवेशन अनिवार्य रहेको तर्क प्रस्तुत गरियो।

यसै सन्दर्भमा केन्द्रीय नेतृत्व र जिल्ला समितिको ध्यानाकर्षण गराउँदै, भक्तपुर काँग्रेसले संस्थागत अनुशासनको परम्परा जोगाउन, संगठनलाई थप सक्रिय र प्रभावकारी बनाउँदै अघि बढाउन आजको पत्रकार सम्मेलन महत्वपूर्ण राजनीतिक सन्देशवाहक बनेको छ। यो सम्मेलनले भक्तपुर कांग्रेस कार्यकर्ताहरूको आकांक्षा, लोकतान्त्रिक प्रक्रियाप्रतिको प्रतिबद्धता र नेतृत्व सुधारको सङ्केत दिएको राजनीतिक टिप्पणी गर्न सकिन्छ।