मोहन बुढा, डोल्पा

पुस ५, २०८२

​डोल्पाको ठूलीभेरी नगरपालिकामा नेपाली सेनाका जवानले सर्वसाधारणमाथि कुटपिट गरेको घटनालाई लिएर स्थानीय जनप्रतिनिधि, नागरिक समाज र राजनीतिक दलहरूले गम्भीर ध्यानाकर्षण गराएका छन्। जिल्ला सुरक्षा समिति डोल्पालाई एक ज्ञापनपत्र बुझाउँदै उनीहरूले सुलिगार्डस्थित संयुक्त चेकजाँच पोष्ट तत्काल हटाउन माग गरेका छन्।

​घटना विवरण अनुसार, गत पुस ३ गते साँझ ६ बजेतिर सुलिगार्ड चेकपोष्टमा खटिएका नेपाली सेनाका सिपाहीहरूले ठूलीभेरी नगरपालिका वडा नं. ६ का ओम प्रसाद रोकाया माथि हातपात गरेका थिए। पीडित पक्षका अनुसार सेनाले गालीगलौज गर्नुका साथै अङ्गभङ्ग हुने गरी कुटपिट गरेको र त्रासपूर्ण वातावरण सिर्जना गरेको थियो।सुरक्षा समितिमा बुझाइएको पत्रमा भनिएको छ कि शे-फोक्सुण्डो राष्ट्रिय निकुञ्जको संरक्षणका लागि स्थापना भएको ब्यारेकले निकुञ्जको कार्यक्षेत्र बाहिर गएर स्थानीयलाई दुःख दिएको छ। भेरी नदी पारी रहेको सो चेकपोष्ट निकुञ्जको मध्यवर्ती क्षेत्र वा कोर एरियामा नपर्ने र त्यो स्थानीय सरकारको क्षेत्राधिकार भित्र पर्ने दाबी गरिएको छ।

​"शान्ति सुरक्षा कायम गर्ने निकायबाटै सर्वसाधारण त्रसित हुनु निन्दनीय छ," ज्ञापनपत्रमा उल्लेख छ। स्थानीयले दोषीलाई कडा कारबाही, घाइतेको उपचार र २४ घण्टाभित्र उक्त चेकपोष्ट निकुञ्ज क्षेत्रभित्रै सार्न अल्टिमेटम दिएका छन्। उक्त ज्ञापनपत्रमा नेपाली कांग्रेसका दशरथ रोकाया, नेकपा एमालेका नर बहादुर बुढा, माओवादी केन्द्रका नेताहरू र नागरिक समाजका प्रतिनिधिहरूको हस्ताक्षर रहेको छ। माग पूरा नभए थप सशक्त आन्दोलन गर्ने चेतावनी समेत दिइएको छ।