काठमाडौँ । त्रिभुवन विश्वविद्यालयको ५०औँ दीक्षान्त समारोहमा सहभागी हुन आवेदन दिएका विद्यार्थीहरूका लागि गाउन, टोपी र स्कार्फ बुझ्ने आज अन्तिम दिन रहेको छ। तोकिएको समयभित्र आफ्नो परिचयपत्र र रसिद लिएर गाउन बुझ्न विश्वविद्यालयले आग्रह गरेको छ।

१. फारम भर्ने र सहभागी हुने प्रक्रिया

​यो पटक फारम भरेर अर्को पटक सहभागी हुन पाइन्छ?

त्रि.वि.को प्रचलित नियम अनुसार, जुन सालको लागि फारम भरिएको हो, सोही वर्ष मात्र सहभागी हुन पाइन्छ। अर्को पटकका लागि यो मान्य हुँदैन।

​अर्को वर्षको फारम कहिले खुल्छ?

सामान्यतया दीक्षान्तको अनलाइन फारम हरेक वर्षको साउन–भदौ महिनातिर खुल्ने गर्दछ।

​२. योग्यता र मार्कसिट सम्बन्धी

​सहभागी हुन कति प्रतिशत चाहिन्छ?

दीक्षान्तमा सहभागी हुन कुनै विशेष प्रतिशत वा डिभिजन तोकिएको हुँदैन। यदि तपाईं न्यूनतम अंक ल्याएर 'पास' हुनुभएको छ भने सहभागी हुन पाउनुहुन्छ।

​ब्याक लागेको वा स्टार भएको मार्कसिट भए के गर्ने?

ब्याक पेपर दिएर उत्तीर्ण भएका वा मार्कसिटमा स्टार लागेका विद्यार्थीहरू पनि दीक्षान्तमा सहभागी हुन योग्य हुन्छन्।

​कुन तहका विद्यार्थी सहभागी हुन पाउँछन्?

स्नातक (Bachelor's), स्नातकोत्तर (Master's), एम.फिल (M.Phil) र विद्यावारिधि (PhD) तह उत्तीर्ण गरेका सबै विद्यार्थीहरू यसमा सहभागी हुन सक्छन्।

​३. ट्रान्सक्रिप्ट र प्रमाणपत्र सम्बन्धी नियम

​सहभागिताको लागि समयसीमा:

दीक्षान्तमा सहभागी हुन उत्तीर्ण भएको मितिभन्दा पनि ट्रान्सक्रिप्ट बनेको मिति महत्वपूर्ण हुन्छ। उदाहरणका लागि: यदि तपाईं २०८३ को दीक्षान्तमा सहभागी हुन चाहनुहुन्छ भने, तपाईंको ट्रान्सक्रिप्ट २०८२ असार १ देखि २०८३ जेठ ३१ गतेभित्र बनेको हुनुपर्छ।

​दीक्षान्तमा नगई मूल प्रमाणपत्र लिन मिल्छ?

मिल्छ। यदि तपाईं दीक्षान्त समारोहमा सहभागी हुनुभएन भने पनि त्रिभुवन विश्वविद्यालयको परीक्षा नियन्त्रण कार्यालय, बल्खुमा आवश्यक प्रक्रिया पूरा गरी आफ्नो मूल प्रमाणपत्र (Original Certificate) बनाउन सक्नुहुन्छ।

​विशेष सूचना: आज गाउन र स्कार्फ लिने अन्तिम अवसर हो, त्यसैले समयमै आफ्नो सामग्री बुझिलिनुहोला!