जाजरकोट — विनाशकारी भूकम्पका कारण क्षतिग्रस्त बनेको ऐतिहासिक तथा पुरातात्विक महत्त्वको जाजरकोट दरबारको पुनर्निर्माणमा ढिलाइ भएपछि स्थानीयस्तरमा नागरिक दबाब अभियान निरन्तर रूपमा अगाडि बढाइएको छ। "जाजरकोट दरबार कहिले बन्छ?" भन्ने मुख्य प्रश्नसहित युवाहरूले हाम्रो पहिचान र गौरव बोकेको ऐतिहासिक धरोहर जोगाउन जोडदार आवाज उठाइरहेका हुन्।
युवा अभियन्ता तारा शर्माले दिएको जानकारी अनुसार, लामो समयसम्म दरबार बेवारिसे अवस्थामा रहेकाले यसको संरक्षणका लागि चौतर्फी दबाब सिर्जना गर्न यो अभियान सुरु गरिएको हो। अभियानमार्फत सरकारसँग तत्काल पुनर्निर्माण प्रक्रिया थाल्न, आवश्यक बजेट विनियोजन गर्न र स्थानीय सरोकारवालाको सहभागिता सुनिश्चित गर्न माग गरिएको छ। हाम्रो साझा सम्पदाको अस्तित्व जोगाउन सबै पक्ष एकजुट हुनुपर्नेमा अभियन्ताहरूले जोड दिएका छन्।
