गगन र बालेनलाई ओलीको चुनौती: 'प्रधानमन्त्रीको एजेन्डामा लाइभ डिबेट गरौँ'
काठमाडौं, माघ १० (२०८२) । नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले आगामी निर्वाचनका लागि प्रस्तावित प्रधानमन्त्रीका उम्मेदवारहरूबीच सार्वजनिक बहस (पब्लिक डिबेट) गर्न आफू पूर्ण रूपमा तयार रहेको घोषणा गरेका छन्।
शनिबार ललितपुरको च्यासलस्थित पार्टी मुख्यालयमा पत्रकारहरूसँग कुरा गर्दै ओलीले देशको भावी नेतृत्वका लागि दाबेदार नेताहरू एउटै मञ्चमा उभिएर आफ्ना योजना र एजेन्डाबारे छलफल गर्न आवश्यक रहेको बताए।
बहसका लागि ओलीको 'ग्रिन सिग्नल'
पत्रकारले "के तपाईं भावी प्रधानमन्त्रीका उम्मेदवारहरूसँग सार्वजनिक संवादका लागि तयार हुनुहुन्छ?" भनी सोधेको प्रश्नमा ओलीले सकारात्मक जबाफ दिँदै भने— "बिल्कुल, त्यस्तो कार्यक्रम आवश्यक छ। प्रधानमन्त्रीको उम्मेदवार हुँ भन्नेहरूको बीचमा संवाद कार्यक्रम राख्नुस् र एउटा पब्लिक डिबेट, ओपन लाइभ गर्न आवश्यक छ।"
उनले बहसको औचित्य प्रष्ट्याउँदै थपे, "को किन प्रधानमन्त्री हुनुपर्ने र के गर्नका लागि प्रधानमन्त्री हुनुपर्ने भन्ने कुरा त जनताका अगाडि छलफल हुनुपर्यो नि!"
त्रिपक्षीय भिडन्तको संकेत
पछिल्लो राजनीतिक घटनाक्रमले आगामी निर्वाचनमा मुख्य तीन धारबीच प्रतिस्पर्धा हुने देखिएको छ:
नेकपा एमाले: सचिवालय बैठकले अध्यक्ष केपी शर्मा ओलीलाई नै भावी प्रधानमन्त्रीको उम्मेदवारका रूपमा अघि सारेको छ।
नेपाली कांग्रेस: भर्खरै सम्पन्न केन्द्रीय कार्यसमिति बैठकले सभापति गगन थापालाई प्रधानमन्त्रीको उम्मेदवार बनाउने औपचारिक निर्णय गरिसकेको छ।
रास्वपा र बालेन पक्ष: काठमाडौं महानगरका पूर्वमेयर बालेन शाह राष्ट्रिय स्वतन्त्र पार्टी (रास्वपा) सँगको एकतासँगै प्रधानमन्त्रीको उम्मेदवारका रूपमा चर्चामा छन्।
सामाजिक सञ्जालको मागलाई समर्थन
पछिल्लो समय सामाजिक सञ्जालमा पश्चिमी देशहरूको शैलीमा प्रधानमन्त्रीका उम्मेदवारहरूबीच 'लाइभ डिबेट' हुनुपर्ने माग जोडतोडले उठिरहेको छ। ओलीको यो पछिल्लो अभिव्यक्तिले गगन थापा र बालेन शाहसँगको सम्भावित बौद्धिक र राजनीतिक भिडन्तका लागि बाटो खोलेको छ।
