ललितपुर, ४ पुस २०८२
ललितपुरको महालक्ष्मी नगरपालिकास्थित महालक्ष्मी क्याम्पसमा नेपाल विद्यार्थी संघ (नेविसंघ) को संगठन विस्तार तथा सुदृढीकरण कार्यक्रम भव्य रूपमा सम्पन्न भएको छ। विद्यार्थीहरूका बीचमा लोकतान्त्रिक संस्कार र शैक्षिक एजेन्डालाई अगाडि बढाउने उद्देश्यले आयोजित उक्त कार्यक्रमले क्याम्पसमा नयाँ नेतृत्व प्रदान गरेको छ।
नेविसंघ ललितपुरका जिल्ला अध्यक्ष सरोज घोरसाइनेको अध्यक्षतामा सम्पन्न यस विशेष कार्यक्रममा नेपाली कांग्रेस ललितपुरका जिल्ला सदस्य रोनिल पौडेल प्रमुख अतिथिका रूपमा उपस्थित हुनुहुन्थ्यो। कार्यक्रमलाई सम्बोधन गर्दै प्रमुख अतिथि पौडेलले विद्यार्थी राजनीति केवल पदका लागि मात्र नभई शैक्षिक सुधार र सामाजिक रूपान्तरणका लागि हुनुपर्नेमा जोड दिनुभयो।
कार्यक्रममा अतिथिहरूको तर्फबाट ललितपुर जिल्ला विद्यार्थी संघका उपाध्यक्ष निराजन शर्मा र नेविसंघ जिल्ला सदस्य कुशल कार्कीले संगठनको महत्व र आगामी कार्यदिशाबारे आफ्ना तार्किक धारणाहरू राख्नुभएको थियो। उहाँहरूले विद्यार्थी संगठनले विद्यार्थीका हकहितका साथै क्याम्पसको चौतर्फी विकासमा रचनात्मक दबाब दिनुपर्ने बताउनुभयो।
नयाँ नेतृत्व चयन
संगठन विस्तारकै क्रममा नबिन दनुवारलाई महालक्ष्मी क्याम्पस ईकाइ सभापतिको जिम्मेवारी सुम्पिएको छ। दनुवारको नेतृत्वमा क्याम्पसको नयाँ कार्यसमितिले पूर्णता पाएको छ। नवनियुक्त सभापति दनुवारलाई उपस्थित अतिथि तथा विद्यार्थीहरूले सफल कार्यकालको शुभकामना दिँदै 'जय नेपाल'को नाराका साथ बधाई ज्ञापन गरेका थिए।
अन्त्यमा, सभाध्यक्ष सरोज घोरसाइनेले नयाँ कार्यसमितिलाई बधाई दिँदै आगामी दिनमा नेविसंघले क्याम्पसभित्रका शैक्षिक समस्या समाधान गर्न र विद्यार्थी एकता कायम गर्न अग्रणी भूमिका खेल्ने विश्वास व्यक्त गर्नुभयो।
@shinenews
