काठमाडौं, २६ पुस ।
स्वतन्त्र विद्यार्थी युनियन (स्ववियु) परिषद् नेपालले नेपाली कांग्रेसको १५औँ महाधिवेशन र विशेष महाधिवेशनको मागलाई नीतिगत रूपमा सम्बोधन गर्न माउ पार्टीमाथि दबाब बढाएको छ। परिषद्का अध्यक्ष रोहित कपालीले एक विज्ञप्ति जारी गर्दै युवा विद्यार्थीहरूको भावनालाई कदर गर्न र पार्टीभित्रको लोकतान्त्रिक संस्कारलाई जीवन्त राख्न एकजुट हुन आह्वान गर्नुभएको छ।
विज्ञप्तिमा भनिएको छ, "विगत २०६५ सालपछि पहिलो पटक लोकतान्त्रिक प्रक्रियाबाट स्ववियु परिषद्को निर्वाचन सम्पन्न गर्न नेपाली कांग्रेस र नेविसंघमा आबद्ध युवाहरूको भूमिका महत्वपूर्ण रहेको छ।" परिषद्ले भदौ २३ गते 'जेन्जी' (Gen-Z) समूहको आन्दोलनमा ज्यान गुमाउनेहरूप्रति श्रद्धाञ्जली व्यक्त गर्दै उक्त आन्दोलनले उठाएका मुद्दाहरूलाई संस्थागत गर्नुपर्नेमा जोड दिएको छ।
पार्टीभित्र हाल चलिरहेको विशेष महाधिवेशन सम्बन्धी विवादप्रति गम्भीर चासो देखाउँदै अध्यक्ष कपालीले पुरानै प्रतिनिधिहरूको भूमिका रहँदा युवाहरूको उत्साह घट्ने उल्लेख गर्नुभएको छ। नियमित १५औँ महाधिवेशनको पक्षमा उभिँदै परिषद्ले युवाहरूको सहभागिता सुनिश्चित हुने गरी नीतिगत सुधार गर्न र मागहरू पूरा गर्न माउ पार्टीलाई दबाब सिर्जना गर्न सम्पूर्ण युवाहरूलाई एकजुट हुन अपील गरेको छ।
@shinenews
