ललितपुर । कक्षा ९ मा अध्ययनरत अवस्थामै कालीदेवी माध्यमिक विद्यालयको इकाइ सभापतिको जिम्मेवारी सम्हाल्दै विद्यार्थी राजनीतिमा प्रवेश गरेका युवराज लामा (थिङ) अहिले नेपाली कांग्रेसको युवा पुस्तामाझ चर्चामा आएका छन्।
विद्यालय तहबाट सुरु भएको उनको राजनीतिक यात्रा क्याम्पस हुँदै पार्टी राजनीतिसम्म आइपुगेको छ। विद्यार्थी राजनीतिमा सक्रिय रहँदै उनी पाटन संयुक्त क्याम्पसको स्वतन्त्र विद्यार्थी युनियन (स्ववियु) सभापतिको उम्मेदवारसमेत बनेका थिए। २०७९ को स्ववियु निर्वाचनमा उनलाई नेपाल विद्यार्थी संघले पाटन क्याम्पसको सभापति पदका लागि आधिकारिक उम्मेदवार बनाएको थियो।
पाटन क्याम्पसको स्ववियु सभापतिको उम्मेदवारीलाई उनको विद्यार्थी राजनीतिक यात्राको महत्वपूर्ण अध्यायका रूपमा लिइन्छ। विद्यार्थीका मुद्दा, नेतृत्व क्षमता र संगठनात्मक सक्रियताबाट राजनीतिक चेतना विकास गर्दै आएका लामा अहिले पार्टीको मूल राजनीतिमा युवा पुस्ताको भूमिका खोजिरहेका छन्।
उनको राजनीतिक यात्राको अर्को महत्वपूर्ण पक्ष भनेको बीपी कोइरालाको विचार र लोकतान्त्रिक समाजवादप्रतिको प्रतिबद्धता हो। बीपीले अघि सारेको लोकतन्त्र, सामाजिक न्याय, राष्ट्रियता र जनताको अधिकारको राजनीतिक धारलाई आजको पुस्ताको आवश्यकता र बदलिँदो सामाजिक परिवेशसँग जोडेर अघि बढ्नुपर्ने धारणा उनले राख्दै आएका छन्।
लामाका लागि युवा नेतृत्व केवल उमेरको प्रतिनिधित्व होइन। युवा सोच, जवाफदेहिता, लोकतान्त्रिक संस्कार र समाजप्रतिको जिम्मेवारीलाई राजनीतिक नेतृत्वको आधार बनाउने प्रयास नै आफ्नो प्राथमिकता रहेको उनीनिकटहरूको भनाइ छ।
‘जेनेरेशन जेड’ आन्दोलनका क्रममा पनि उनको नाम चर्चामा आएको थियो। आन्दोलनको दोस्रो दिन कर्फ्युका बीच तत्कालीन परिस्थितिबारे चासो राख्दै राष्ट्रपति खोज्न हिँडेको प्रसंगलाई लिएर उनी सामाजिक सञ्जालमा आलोचना तथा साइबर बुलिङको सामना गर्न पुगेको बताइन्छ। त्यसबेलाका घटनालाई लिएर फरक–फरक धारणा भए पनि, लामाले ती अनुभवलाई आफ्नो राजनीतिक यात्राको सिकाइका रूपमा लिँदै अघि बढिरहेको बताउँदै आएका छन्।
विद्यार्थी राजनीतिबाट सडक र समाजका मुद्दा बुझ्दै पार्टी राजनीतिमा प्रवेश गरेको पुस्ताले अब नेतृत्वमा आफ्नो स्थान खोज्न थालेको छ। यही परिवेशमा नेपाली कांग्रेसको १५औँ महाधिवेशन नजिकिँदै गर्दा लामा युवा क्लस्टरतर्फबाट ललितपुर क्षेत्र नम्बर १ बाट उम्मेदवारी दिने तयारीमा छन्।
कालीदेवी माध्यमिक विद्यालयको इकाइ सभापतिदेखि पाटन क्याम्पसको स्ववियु सभापतिको उम्मेदवारसम्मको यात्रा र अहिले नेपाली कांग्रेसको महाधिवेशनमा युवा क्लस्टरतर्फबाट प्रतिनिधित्वको तयारी—लामाको राजनीतिक यात्राले विद्यार्थी राजनीतिबाट पार्टीको मूल नेतृत्वतर्फ अघि बढिरहेको नयाँ पुस्ताको आकांक्षालाई प्रतिबिम्बित गर्छ।
बीपी कोइरालाको विचारलाई आधार बनाएर लोकतान्त्रिक मूल्य, सामाजिक न्याय र युवाको सहभागितालाई राजनीतिक यात्राको केन्द्रमा राख्ने प्रयास गरिरहेको बताउने लामाको आगामी कदमले नेपाली कांग्रेसभित्रको युवा नेतृत्व र पुस्तान्तरणको बहसलाई थप बल दिने देखिन्छ।
