​वन्यजन्तुको त्रास र सरकारी उपेक्षाका विरुद्ध बर्दियालीको काठमाडौँमा प्रदर्शन

काठमाडौँ, २६ पुस ।

बर्दिया राष्ट्रिय निकुञ्ज र आसपासका वन क्षेत्रबाट निस्कने वन्यजन्तुको आक्रमणबाट पीडित बनेका बर्दियाली नागरिकहरू आफ्नो जीउधनको सुरक्षाको माग गर्दै काठमाडौँ आइपुगेका छन्। 'वन्यजन्तु पीडित नागरिक समूह, बर्दिया' को ब्यानरमा भेला भएका पीडितहरूले आज काठमाडौँको शान्ति बाटिकामा प्रदर्शन गर्दै राज्यको ध्यानाकर्षण गराएका हुन्।

​उक्त आन्दोलनको नेतृत्व गरिरहेका सुरेन्द्र विश्वकर्माले बर्दियाका जनताले वर्षौँदेखि बाघ, हात्ती र अन्य वन्यजन्तुको डरमा बाँचिरहनु परेको तर सरकारले उचित सुरक्षा र क्षतिपूर्ति नदिएको गुनासो गरे। उनले भने, "हामीले संरक्षणको मूल्य आफ्नै रगतले तिर्नुपरेको छ। निकुञ्जका जनावरले मान्छे मारिरहँदा पनि सरकार मूकदर्शक बनेर बस्नु विडम्बनापूर्ण छ।"

​प्रदर्शनकारीहरूले "हामीलाई वन्यजन्तुबाट बचाऊ", "पीडितलाई उचित क्षतिपूर्ति र रोजगारीको व्यवस्था गर" जस्ता माग लेखिएका प्लेकार्डहरू प्रदर्शन गरेका थिए। उनीहरूका मुख्य मागहरूमा वन्यजन्तुको आक्रमणमा परी ज्यान गुमाएका परिवारलाई उचित राहत, घाइतेको निःशुल्क उपचार, निकुञ्ज वरपरका बस्तीमा बलियो तारवार र वन्यजन्तुमैत्री पूर्वाधार निर्माण रहेका छन्।

​पीडित समूहले आफूहरूका माग पूरा नभएसम्म काठमाडौँ नछोड्ने र आन्दोलनलाई अझ सशक्त बनाउने चेतावनी दिएका छन्। पुस्ताौँदेखि चल्दै आएको यो मानव-वन्यजन्तु द्वन्द्वलाई दीर्घकालीन रूपमा समाधान गर्न र नागरिकको बाँच्न पाउने अधिकार सुनिश्चित गर्न उनीहरूले प्रधानमन्त्री र सम्बन्धित मन्त्रीलाई ज्ञापनपत्र बुझाउने तयारी समेत गरेका छन्।