भक्तपुर । नेपाली कांग्रेसको १५औँ महाधिवेशनअन्तर्गत भक्तपुर निर्वाचन क्षेत्र नं. २ बाट ३५ वर्षमुनिको युवा क्लस्टरतर्फ रुपेश पौडेलले महाधिवेशन प्रतिनिधिका लागि उम्मेदवारी दिएका छन्। युवाको सहभागिता, सामाजिक सेवा, वातावरण संरक्षण र संगठनात्मक सक्रियतालाई आफ्नो प्राथमिकतामा राख्दै पौडेल महाधिवेशन प्रतिनिधिको दौडमा अघि बढेका हुन्।
पौडेल नेपाल विद्यार्थी संघ (नेविसंघ)का निवर्तमान केन्द्रीय सदस्य, नेविसंघ वातावरण विभाग प्रमुख तथा नेविसंघ जिल्ला स्थानीय तह सह–संयोजकका रूपमा जिम्मेवारी सम्हालिसकेको बताइएको छ। विद्यार्थी राजनीतिबाट सामाजिक अभियान र संगठनात्मक गतिविधिमा सक्रिय रहँदै आएका पौडेलले युवाको आवाजलाई पार्टीको नीति तथा निर्णय प्रक्रियामा प्रभावकारी रूपमा स्थापित गर्ने विषयलाई आफ्नो मुख्य एजेन्डा बनाएका छन्।
‘एक घर, एक गमला’ अभियानदेखि सामाजिक सेवासम्म
पौडेलको सामाजिक अभियानमध्ये ‘एक घर, एक गमला’ अभियान पनि उल्लेखनीय रहेको छ। भक्तपुर जिल्लामा माटोका गमला, भाँडालगायत विभिन्न मौलिक सामग्री बनाउने प्रजापति समुदायको परम्परागत पेशा तथा व्यवसायलाई सहयोग पुर्याउने उद्देश्यले यो अभियान सञ्चालन गरिएको पौडेलले बताएका छन्।
स्थानीय रूपमा उत्पादन हुने माटाका गमला तथा सामग्रीको प्रयोगलाई प्रोत्साहन गर्दै एकातर्फ घर–घरमा हरियाली र वातावरण संरक्षणको सन्देश पुर्याउने तथा अर्कोतर्फ भक्तपुरका प्रजापति समुदायको मौलिक सीप, पेशा र व्यवसायलाई बजार तथा उपभोक्तासँग जोड्ने उद्देश्य अभियानको रहेको उनको भनाइ छ।
यसैगरी ‘एक घर, एक फलफूलको बोट’ लगायतका अभियानमार्फत वातावरण संरक्षण, हरियाली प्रवर्द्धन र युवालाई सामाजिक काममा जोड्ने प्रयास गरिएको पौडेलको दाबी छ।
कोभिडका बेला स्वास्थ्य सेवामा पनि सक्रिय
कोभिड–१९ महामारीका समयमा पौडेल नेपाल–कोरियन इन्टरनेशनल फ्रेन्डसिप हस्पिटल, महावीर पुनको राष्ट्रिय आविष्कार केन्द्र तथा युवान्तर नेपालको समन्वयमा हाई केयर सेन्टर र हेल्थ बुथ निर्माण कार्यमा संलग्न रहेको बताइएको छ।
संकटको समयमा समुदायको आवश्यकता पहिचान गरी स्वास्थ्य तथा सामाजिक क्षेत्रमा सहयोग पुर्याउने उद्देश्यले उक्त कार्य गरिएको पौडेलको भनाइ छ। त्यसअघि शैक्षिक क्षेत्रमा Montessori Advanced Classes लगायतका गतिविधिमा समेत आफ्नो संलग्नता रहेको उनले उल्लेख गरेका छन्।
युवालाई संगठन र निर्णय प्रक्रियामा जोड्ने एजेन्डा
पौडेलले युवा पुस्तालाई केवल चुनावका समयमा मात्रै नभई पार्टीको नियमित संगठनात्मक गतिविधि, नीति निर्माण र निर्णय प्रक्रियामा समेत अर्थपूर्ण रूपमा सहभागी गराउनुपर्ने धारणा अघि सारेका छन्।
उनको उम्मेदवारीसँगै युवा नेतृत्व विकास, सामाजिक उत्तरदायित्व, वातावरण संरक्षण, स्थानीय उद्यम तथा मौलिक पेशाको संरक्षण र संगठनात्मक सक्रियतालाई जोडिएको छ।
पौडेलले “परम्पराको सम्मान, परिवर्तनको स्वरूप, समुन्नत नेपालको लागि सबल कांग्रेस—अबको विकल्प” भन्ने नारासहित आफ्नो उम्मेदवारी अघि सारेका छन्।
भक्तपुर निर्वाचन क्षेत्र नं. २ मा ३५ वर्षमुनिको युवा क्लस्टरबाट उनको उम्मेदवारीले महाधिवेशनमा युवा प्रतिनिधित्व, सामाजिक अभियान र संगठनमा नयाँ पुस्ताको भूमिकाबारे बहसलाई थप अगाडि ल्याएको छ।
@ShineENews
